Беҙҙең проекттар

22.02.2018

Рәсәйҙә йылдың иң ҙур иҡтисади ваҡиғаларының береһе- Сочи форумы үтте. Унда Башҡортостандан Республика башлығы Рөстәм Хәмитов етәкселегендәге делегация ҡатнашты. 11 килешеүгә ҡул ҡуйылды. Һөҙөмтәлә республика иҡтисадына 70 миллард һумға яҡын йәлеп ителәсәк.

15.02.2018

Башҡортостанда кадрҙар әҙерләү темаһы һүҙҙән эшкә күсә башланы. Әле нисек? Предприятие – кадрҙар булмауына, уҡыу йорто - дипломлы белгестәренең эш таба алмауына, ә йәштәр эш урыны юҡлыҡҡа зарлана. Барыһы ла система булмауға барып төртөлә. Эш биреүсе аҙмы-күпме тәжрибәһе булған белгесте күрергә теләй. Белгес төшөмлөрәк урын эҙләй. Уҡыу йорто иһә йыл һайын, хеҙмәт баҙары ҡанундарын әллә ни иҫәпкә алмай, төрлө һөнәрҙәр буйынса дипломдар биреп сығара. Бына ошо үҙенсәлекле өсмөйөштө хәл итеү буйынса тәүгеләрҙән булып агросәнәғәт комплексы яңылыҡ индерә. Ауыл хужалығы министрлығы башланғысы менән эш биреүсе һәм белгес әҙерләүселәр араһында тәүге килешеү төҙөлдө. Атап әйткәндә, республиканың барлыҡ ҡошсолоҡ предприятиеларын үҙенә туплаған "Рәсәй игене" холдингы үҙенә белгестәрҙе өйрәтеп аласаҡ.

08.02.2018

Башҡортостанда 2017 йылдың яҙында юл картаһы раҫланды. Ул төбәктә балыҡсылыҡты үҫтереүгә арнала. Әлегә республикала етештерелгән балыҡ нисбәте үҙ баҙарыбыҙҙа 5 проценттан артмай. Башҡортостанда йылына 28 мең тонна балыҡ һатыла, уның 1 меңе генә – үҙебеҙҙеке. Бына ошо тармаҡҡа быға тиклем малсылыҡ менән шөғөлләнгән Күгәрсен фермеры ҡушылды. "37 гектар ерем бар, унда һалҡын һыулы шишмә лә аға. Шуға балыҡ үрсетеп ҡарарға ниәтләнек, һалҡын һыуҙы яратҡан бағыр үҫтерәбеҙ", - ти Ғаяз Фәтҡуллин.

01.02.2018

Сәнәғәт һәм көнкүреш ҡалдыҡтарын йыйыу, эшкәртеп, яңы продукция сығарыу тураһында барыһы ла белә. Уның ике яҡлы отошло булыуын да таныйбыҙ. Берҙән, тәбиғәтте бысраныуҙан аҙмы-күпме һаҡлайбыҙ, йәш быуында экологик мәҙәнилек тәрбиәләйбеҙ. Икенсенән, бындай сеймал байтаҡҡа арзаныраҡ. Сөнки кәрәкмәй, тип сығарып ташланғандан ғибәрәт. Мәҫәлән, ҡыйлыҡтағы пластик шешә. Ошо алымды файҙаланған пластмасс йыһаздар заводы Октябрскийҙа эшләп килә. Уны ҡала бюджетын төп тулыландырыусы тип баһалайҙар, республиканың иң эре һалым түләүселәр исемлегенә лә индерелде. Ә 2017 йыл йомғаҡтары буйынса пластик ҡалдыҡтарҙан халыҡ өсөн кәрәкле тауар етештереүен иҫәпкә алып, предприятие директоры тәбиғәтте һаҡлау йәһәтенән "Йыл кешеһе" тип иғлан ителде.

25.01.2018

Республика етәкселеге хужалыҡтың иҫке яңы йүнәлеше- кооперациялар темаһын етди күтәрә. Айырыуса ауыл хужалығында. Мәҫәлән, Ҡыйғыла. Ә районда фермерҙар аҙ түгел. Иген үҫтереүселәр ҙә, мал үрсетеүселәр ҙә, йәшелсә етештереүселәр ҙә.

18.01.2018

Урман - төп байлығыбыҙ, планетабыҙҙың үпкәһе, ерҙең йәшел ҡалҡаны һәм башҡа шиғар-плакаттар һәр кемгә бала саҡтан таныш. Әммә һуңғы йылдарҙа был байлыҡтың беҙҙеке түгеллеге асыҡланды. Эре етештереүсе килә, урманды ҡуртымға ала, ауҙара, ботай, тейәп алып китә. Ә халыҡҡа төҙөлөш кәрәк-яраҡтары өсөн урман бүлеү күләме кәмегәндән-кәмей бара. Икенсе яҡтан күҙ ташлайыҡ. 1 гектар йүкәлектән 1 тоннаға тиклем бал алырға була. Әле уны ҡырҡыу өсөн билет 25 мең һум тора. Балға әйләндергәндә, ошо уҡ майҙандан 250 мең һум табыш алырға мөмкин. Рәсәй йүкәлектәренең 50 проценты – Башҡортостанда. Йәғни, беҙҙә ҡырҡһаҡ илдә йүкә урмандары яртылаш бөтә тигән һүҙ. Яҡшы бал бирерҙәй яңыһы үҫкәнсе 40 йыл көтөргә кәрәк.

11.01.2018

Арболит - ағас юнысҡы-сыралар ҡушып эшләнгән кирбес. Голландар бер быуат элек уйлап тапҡан, ҡулланған. Тиҙ арала Европа дәүләттәрендә, Канада, Америкала киң танылыу ала. Сөнки экологик таҙа, етештереүҙә ябай, аҙ сығымлы, йылыны яҡшы һаҡлай, тауышты үткәрмәй. Советтар союзына ла 60-сы йылдарҙа индерелә, хатта сит ил өлгөләрен файҙаланып, ГОСТ стандарттары буйынса әҙерләү ҙә ойошторола, заводтар асыла. Антарктидала бер нисә объект төҙөйҙәр. Стенаның ҡалынлығы 30 сантиметр булһа ла, ҡотопта һалҡынды үткәрмәй, йылыны яҡшы тота. Тик беҙҙең илдә ул киң танылыу алмай - беҙҙә йорттар төҙөлөшөндә эре панелдәргә өҫтөнлөк бирелә.

22.12.2017

Республикала тәбиғәт парктары йәнә берәүгә арта. Яңыһы Ғафури биләмәләрендә була, ғафуриҙарҙың ғорурлығы булған йылғалары - Еҙем исемен йөрөтәсәк. Киндерле, ҡайһы берәүҙәр уны Еңеү мәмерйәһе тип белә, республикала иң ҙурҙарҙан. Әммә әлеге ваҡытта ташландыҡ хәлдә, туристарҙың уның менән һоҡланыуы нәтижәһе. Киндерленән тыш та, йөҙәрләгән мәмерйә бар Еҙем буйында. Йылға, уның ярҙары таҙалығы ла етди хәүеф аҫтында, шуға тәбиғи парк ойошторорға ҡарар ителгән.

14.12.2017

2018 йылда бюджет параметрҙары шулайыраҡ: дөйөм килемдәр – 153,4, сығымдар 162,4 миллиард һум. Федераль ҡаҙна иһә түбәндәгесә: 2018 йылға килемдәр 15 триллион 180 миллард, сығымдар 16 триллион ярым. Рәсәйҙә ҡаҙна дефициты 1 триллион 270 миллард һум. Барыһы ла иҫәпләнгән, хөкүмәт социаль йөкләмәләренән баш тартмай. Хатта демография, башҡа йүнәлештәр өсөн артыҡ аҡса ла вәғәҙәләйҙәр. Ә аталған дефицитты һалым һәм акциздарҙы арттырып та ҡапларға була.

11.12.2017

Илдең социаль-иҡтисади мөмкинлектәрен йәки ҡеүәтен тикшергәндә барометрҙар байтаҡ. Шуларҙың береһе- төҙөлөш. Һәр төҙөлөш материал талап итә. Кирбес йәки ҡаҙаҡтан башлап, ҡыйыҡ япмаһына тиклем. Һорау булған урында тәҡдим бар. Был – баҙар ҡануны. Ауырғазы районы Үтәймулла ауылынан Хәбир Ильясов та ошо тәғлимәткә таянып яңы эш асҡан - арболит кирбес етештерә. Бындай материалды цементҡа ағас сыралар ҡушып яһайҙар. Арболит блоктар еңел килеп сыға, төҙөүселәр араһында ағасбетон тип йөрөтөлә. Сөнки 80-90 проценты органик материал- ағас сыра йәки юнысҡылары.

30.11.2017

Төбәгебеҙҙең иҡтисади мөмкинлектәрен күрһәтеү өсөн һүҙ эҙләгәндә,  "Байлыҡ – аяҡ аҫтында", тибеҙ. Йәнә бер матур әйтем йәшәп килә - "Дарыу аяҡ аҫтында". Уларҙың икеһен бергә ҡушырға ла мөмкин. Ишембайҙағы кеүек. Маҡар урман хужалығы үлән йыйыу эшен яйға һалған. Бында шифалы боланут (иван-чай) сәйе етештерәләр. Рәсәйҙә үлән киптереү, унан сәй эшләү яңылыҡ түгел, борондан традиция. Бер быуат элек Европаны үлән сәйе менән беҙҙең ил тәьмин иткән.

24.11.2017

Урындағы инфраструктураны яйға һалыу, ремонт, яҡтыртыу, йылытыу, таҙартыу һәм башҡалар хәҙер махсус проект ярҙамында хәл ителә. Берҙәм Рәсәй партияһының “Реаль эштәр” проекты тип атала ул. Төп асылы- граждандарҙың әүҙемлегенә гранттар менән ярҙам итеү, халыҡтың власть менән тура диалогына өлгәшеү. Һайлаусыларҙың республика парламенты депутаттарына наказын үтәү маҡсатында 2015 йылдан ғәмәлгә ашырыла ул. Бәләкәй ауылға ҙур инвестор килтереүе ҡатмарлы. Урындағы проблемаларҙы хәл итеү өсөн ошондай механизмдар бик тә яйлы булып ҡала.

16.11.2017

Донъяның күпселек дәүләттәре алдында етди һынау- урбанистика мәсьәләһе тора. Халыҡ яҡшы тормош эҙләп ҡалаға тартыла. Мегаполистар үҫә, ауылдар бушай бара, дисбаланс тыуа. Ана шуның өсөн хәҙер ауылдарҙың социаль-иҡтисади хәлдәрен яҡшыртыу буйынса төрлө саралар уйлап табыу, ғәмәлгә ашырыуға тырышып ятҡан көндәре. Властың да, бизнестың да, шул уҡ ауыл халҡының үҙенең дә. "Берҙәм Рәсәй" партияһы проекттарының береһе “Ауыл мәҙәниәт йорто” тип атала.2017 йылда 32 район ҡулланды поект менән.

09.11.2017

Күмер етештереү, йәғни яндырыу - иң боронғо кәсептәрҙең береһе. Тимерселәр файҙаланған уның менән. Рәсәйҙә ағас күмеренең тыуған төйәге тип беҙҙең Уралыбыҙҙы атайҙар. Сөнки Демидовтың тимер заводтары өсөн тап ошонда яндырғандар уны, шул иҫәптән беҙҙең ата- олатайҙарыбыҙ ҙа. Учалы эшҡыуары Азат Йәғәфәров та ошо кәсепте табышлы бизнес итә алған. Урманды яндырып ҡына ҡалмай, ҡырҡылған ағастары урынына ултыртып та бара.

02.11.2017

Күсемһеҙ милек, мөлкәт, ер, башҡалар - һәммәһе лә ҡулланылышта, йәғни, табыш килтерә, финанс мөнәсәбәттәрҙә тора, иҡтисадтың төрлө тармаҡтары. Уларҙы хосусилаштырыу, алыу-һатыу, мираҫҡа ҡалдырыу һәм башҡа операциялар өсөн башта мөлкәттең теркәлеүе мөһим. Сөнки һәр сутый ер иҫәпле. Теркәлмәгән ерҙән һалым килмәй.

26.10.2017

Советтар союзы осоронда һәр мәктәптең үҙ баҡсаһы булды. Хатта һыйыр аҫраған мәктәптәр бар ине. Һуңынан балалар көсөн ҡулланыу ҡанунға һыймай тигән демагогик фекер нығынды. Уның бер ниндәй ҙә эксплуатация түгеллеге аңлашыла, хеҙмәт аша тәрбиәне бер кем дә инҡар итмәй. Икенсенән, ошо эштән файҙа килә. Уҡыусыға ла, ата-әсәгә лә, мәктәпкә лә. Иҡтисади ҡатмарлы шарттарҙа көн итмеш даирәбеҙҙә уныһы ла мөһим фактор.

19.10.2017

Рәсәй агросәнәғәт комплексындағы эштәргә йыл һайын октябрь баштарында йомғаҡ яһап алына. Ил төбәктәренән етештереүсе, эшкәртеүсе предприятиелар Мәскәүгә йыйыла, ҡаҙаныштарын бер-береһенә, түрәләргә күрһәтә, башҡаларҙың тәжрибәһен ҡарап, күреп, үҙендә ҡулланып ҡарарға ниәт тотоп ҡайта. Башҡортостан унда йыл һайын ҡатнаша. Быйылғыһында алтын, көмөш, бронза - 313 миҙал, шулай уҡ күргәҙмәнең Гран-приһын алып ҡайтты республика аграрийҙары.

12.10.2017

2021 йылда "Апимондия" беҙҙә үтә, төрлө ҡитғаларҙан умартасылар килә республикаға. Конгресс республиканың иҡтисади үҫешенә лә ҙур йоғонто яһаясаҡ", - ти белгестәр. 10 мең самаһы кеше килеүе көтөлә.

05.10.2017

2015 йылда ШОС-БРИКС ойошмалары саммиттары икеһе бер юлы беҙҙә үткәйне. Ә ошо иҡтисади киңлектәрҙән кесе бизнес вәкилдәре Өфөлә шул йылдың көҙөндә - беренсе, былтыр - икенсе һәм быйыл өсөнсөгә йыйылды. Төбәк менән төбәк форматындағы форумда Рәсәйҙең ике тиҫтәләп төбәге, Ҡаҙағстан, Һиндостан, Үзбәкстан, Ҡытай, Бразилия, Көньяҡ Африка провинциялары вәкилдәре ҡатнашты.

28.09.2017

Республикала инде байтаҡ ваҡыт кооперация мәсьәләләре тикшерелә. Шәхси хужалыҡтарға үҙҙәре етештергән-үҫтергәнде һатыуҙа берләшеү, сеймалдан кибеткә барып етерлек әҙер продукция сығарыу - кооперацияның төп маҡсат һәм бурыстары. Күмәк хужалыҡ тип 1 быуат элек тә баш ватҡандар. Крәҫтиәнде артелгә, колхозға берләштереү ысын көрәш булған. 70 йыл шулай коллективта йәшәгәс, бер көн килеп, союз, уның артынса колхоз юҡҡа сыҡты. Хәлле крәҫтиән - фермер дәүере әйләнеп ҡайтты. Хәҙер уларҙы йәнә берләштерәбеҙ, йәнә кооперацияны данлаған көнөбөҙ. “Сыбыҡтарҙы берәмләп һындырыуы рәхәт, барыһын бергә һындырып булмай”, тигән мәҡәл йәнә актуалгә әйләнде.

Страницы

тура ЭФИР

Online 128 КБитс/с

105.5 FM

Аудио ағым

әле эфирҙа


Һауа торошо (Өфө)

төндә -14..-16°C
иртән -19..-21°C
көндөҙ -11..-13°C
кис -13..-15°C
www.gismeteo.ru
Текста орфографик хата:
Хата тураһында хәбәр итеү өсөн “Хата тураһында хәбәр итегеҙ” төймәһенә баҫығыҙ. Шулай уҡ һеҙ хәбәргә комметарий өҫтәй алаһығыҙ.