Беҙҙең проекттар

11.03.2018

  Фронтовик-шағир, Бөйөк Ватан һуғышы ветераны Хәким Ғиләжев 1923 йылдың 1 мартында хәҙерге Бүздәк районы Ҡаңны-Төркәй ауылында донъяға килә. “Совет Башҡортостаны”(хәҙерге “Башҡортостан”) газетаһында бүлек мөдире, “Ағиҙел” журналының мөхәррире булып эшләй, Башҡортостан Яҙыусылар союзына етәкселек итә. “Погонһыҙ һалдаттар” романы, поэмалары, шиғырҙары төрлө  йылдарҙа баҫылып сығып, халыҡта танылыу яулай. Хәким Ғиләжевтың шиғри шәлкеме  автор уҡыуында  1987 йылда яҙылған. Мөхәррире - Тамара Ғәниева, музыкаль биҙәүсеһе - Альбина Закирова.

04.03.2018

  Күренекле шағирә, милләтебеҙҙең арҙаҡлы гүзәл заты  Таңһылыу Ҡарамышева  Бөрйән районы Байназар ауылында тыуып үҫә, Башҡорт дәүләт университетында уҡығанда  уҡ  әҙәбиәткә ныҡлы аяҡ баҫа. Шиғриәтенә йәнтөйәккә һөйөү, халҡыбыҙҙың ауыҙ-тел ижадында  сағылыш тапҡан мәңгелек ҡиммәттәр рухы хас. Таңһылыу Ҡарамышеваның  шиғри шәлкеме автор уҡыуында яңғырай. 

25.02.2018

   Башҡортостандың халыҡ шағиры  Әнғәм Атнабаевтың тыуыуына 90 йыл тулды. Әнғәм  Атнабаев уҙған быуаттың 50-се йылдарында   уҡ  тәүге шиғырҙары  менән  үҙенсәлекле  талант эйәһе   исемен таныта. Уның  һәр китабын уҡыусылар  йылы ҡабул итә, тормошто яратыу, мөхәббәт  хистәре һәм  йәшлек  саялығы  менән һуғарылған шиғырҙары ятлап алына, композиторҙар тарафынан  байтаҡ лирик  йыр ижад ителә.

    Әнғәм Атнабаевтың шиғырҙарын  Башҡортостандың халыҡ артистары Илсейәр Ғәзетдинова менән Әхәт Мортазин уҡый.

18.02.2018

   “Йылдар буйы моңдар тулып,сыңлап торған күңелле” Сафуан Әлибаевтың  шиғриәте яҡты моңо, тормошто бар  матурлығында  сағылдырыуы менән  арбай. Шиғырҙары композиторҙар тарафынан  көйгә  һалынып,  яратҡан йыр сифатында ла танылыу яуланы.  Сафуан Әлибаевтың шиғри шәлкеме автор уҡыуында  2008  йылда яҙылған.

11.02.2018

  Рәми Ғарипов -   туған башҡорт телебеҙҙе яҡлап тәүге ҡыйыу һүҙ әйткән, халыҡ аңын уятыр ижади  мираҫ ҡалдырған  шағир.  Кеше  тәбиғәтенә хас  иң тәрән хис-тойғоларҙы ябай ҙа, шул уҡ ваҡытта зәргәр оҫталығы менән  илаһи нескәлегендә еткергән әҫәрҙәре – башҡорт шиғриәтен мәңгелек иткән хазина.    Рәми Ғариповтың  шиғри шәлкеме радио фондына Рәсәйҙең һәм Башҡортостандың атҡаҙанған артисы  Илшат Йомағолов уҡыуында  1981 йылда яҙылған. 

04.02.2018

 Назар  Нәжмиҙең  шиғри шәлкеме  радио фондына 1979 йылда яҙылған. Шул замандан  беҙҙе байтаҡ ғүмер айырһа ла, шиғырҙар  Нәжми  күңеленән  аҡ дәфтәргә  әле  генә  төшкән кеүек, әҙип бөгөнгөнөң заңын тойоп, күҙгә тура ҡарап уҡығандай. 

28.01.2018

   Салауат Әбүзәр – моңон, фәлсәфәһен, ғәмен-заңын  үҙенә генә хас шиғри  һүҙгә һалып биреү оҫталығына  эйә әҙип. Хәҙер иғтибарығыҙға Салауат Әбүзәрҙең  мөхәббәт лирикаһынан  шәлкем  тәҡдим итәбеҙ. Автор уҡый. 

21.01.2018

 Зөлфиә Ханнанованың  арнауҙары. Автор уҡыуында яңғырай.

14.01.2018

  Ни бары 24 йыл ғына йәшәп өлгөргән Бабич  ҡалдырған бай әҙәби мираҫтағы әҫәрҙәр шиғриәттең аҫыл үрнәктәре булып тора. Эфирҙа - Шәйехзада Бабичтың шиғырҙарынан төҙөлгән шәлкем.

24.12.2017

 Әнисә Таһирова  халыҡ һөйөүен  күңел иреклеген күтәргән, рух тәрәнлеген еткергән шиғриәте менән яуланы. Башҡорт  шиғриәтен ул сонет һәм элегия жанрҙарында ижад ителгән гүзәл өлгөләре, зауыҡлы тәржемәләре менән байыта. Хәҙер иғтибарығыҙға Әнисә Таһированың шиғри шәлкемен тәҡдим итәбеҙ. Автор уҡыуында яңғырай.

16.12.2017

  Башҡортостандың халыҡ шағиры  Рауил Бикбаев әҙәбиәтебеҙҙе  туған халҡының, Башҡортостаныбыҙ һәм илебеҙҙең  яҙмышын ҡурсалауға, күңеленә тынғы бирмәгән ошо мәңгелек  һорауҙар тураһында быуаттарҙы айҡаған уйҙары, хыялдары, өмөт-ышаныстарынан  туҡылған  юғары нәфис һүҙ оҫталығына эйә  әҫәрҙәре  менән байыта. Шиғри шәлкем автор уҡыуында яңғырай.

10.12.2017

 Фәнил Күзбәков -  төрлө  өлкәләрҙә иркен ҡолас ташлап  эшләгән, илһамланып ижад иткән замандашыбыҙ. Яҙыусы, ғалим, әҙәби тәнҡитсе, педагог. «Тарих фәндәре кандидаты» һәм «филология фәндәре докторы» ғилми дәрәжәләренә эйә.  Фәнил  Тимерйән улы  Күзбәков  Мәләүез районы Әбет ауылында тыуған. Хәрби диңгеҙ флотында хеҙмәт итә, Урал дәүләт университетын тамамлай.  Башҡортостан “Китап” нәшриәтендә  шиғри  йыйынтыҡтары донъя күрә. Әҫәрҙәре газета-журналдарҙа, альманахтарҙа   баҫыла.   Шиғриәтенә  хис-тойғоло  нескә лирика  хас. Ил, халыҡ, милләт  рухындағы тәрән  уй-фекерле ижады  сәсәнлек традицияларына ауаздаш.  Фәнил Күзбәковтың шиғри шәлкеме автор уҡыуында яңғырай.

03.12.2017

  Күренекле әҙип, йәмәғәт эшмәкәре  Йыһат Солтанов   85 йәшлек  ғүмер артылышын билдәләй.  Йыһат Әҙеһәм улы Солтанов  1932 йылдың 3 декабрендә Ейәнсура районы(хәҙерге Ырымбур өлкәһе Һараҡташ районы) Сәнкем-Биктимер ауылында  тыуған. 5 йыл хәрби-диңгеҙ флотында хеҙмәт итә, Башҡорт дәүләт университетында юғары белем ала. “Һәнәк”, “Башҡортостан ҡыҙы”, “Ағиҙел” журналдарында эшләй.  Йыһат Сотланов – прозала  ла, шиғриәттә лә, публицистикала ла  берҙәй егелеп эшләгән әҙип. Ижады  үҙенсәлекле  фекер ҡеүәһе,  үткер һүҙе  менән айырылып тора. “Ерем, кешеләрем”, “Йәдкәр” роман-ҡиссалары,  “Йондоҙ ямғыры”, “Ҡояшлы ҡая”, “Ҡырҡыбыуын”, “Минең шәжәрәм” шиғри йыйынтыҡтары, Сөләймән Мырҙабулатов тураһында  тәүарихы һәм башҡа китаптары  донъя күрә. Ил ағаһына артабан да  халыҡ абруйына хеҙмәт иткән бәҫле ижад, ныҡлы һаулыҡ, име...

19.11.2017

   Башҡортостан  Яҙыусылар  берлеге  ағзаһы,  Жәлил Кейекбаев исемендәге премия лауреаты,  журналист, йәмәғәтсе   Нияз Сәлимов   тыумышы менән Ғафури районы Яугилде ауылынан. Хеҙмәт биографияһының  байтаҡ  йылы  милли матбуғат менән бәйле: “Йәшлек” , “Башҡортостан” газеталарында, Ғафури районының  “Йондоҙ”, “Табын”  баҫмаларында баш мөхәррир булып эшләй. Әҙәби  ижады күберәге йәш быуынға  тәғәйенләнә,  балалар өсөн бер нисә  китабы донъя күрә.  Нияз  Сәлимовтың шиғри шәлкеме автор уҡыуында яңғырай.

12.11.2017

  Ғәбиҙулла Зарипов(әҙәби псевдонимы Ғәбиҙулла) – башҡорт  әҙәбиәтендә  төнгө  йәшендәй  сағыу эҙ ҡалдырған  шағир. Уның  “Шарлама” тип аталған дөйөм  йыйынтыҡта  донъя  күргән  тәүге  шиғри шәлкеме  лә  “Төнгө йәшен” тип атала. Үҙен аяҡтан йыҡҡан ауыр сир менән аяуһыҙ көрәшеүенә ҡарамаҫтан, Ғәбиҙулла Зарипов ҡулынан ҡәләмен төшөрмәй. Халҡыбыҙҙың бай  тел-һүҙенән  туҡылған  нескә  фәлсәфәле, тәрән тойғоға һәм ҡыйыу фекергә эйә  шиғырҙарын, прозаһын, балалар өсөн әҫәрҙәрен  ижад итеүҙән туҡтамай.

05.11.2017

  Әҙибә, журналист, йәмәғәт һәм дәүләт эшмәкәре  Йомабикә  Ильясова  - ғүмеренең  алтын артылышына еткән  замандашыбыҙ.  Шиғриәтенә иһә  үҙ юлын ярған тын йылға  сифаттары хас: нәфис һүҙ зауығын баһалаусыларҙы унда сабырлыҡ, тәрәнлек  һәм сөңгөлдәрҙә генә табылыр сафлыҡ  донъяһы сорнай. 

25.10.2017

  Башҡортостандың халыҡ шағиры, Салауат Юлаев  исемендәге дәүләт премияһы лауреаты Абдулхаҡ Игебаевтың  бер шәлкем шиғыры. Автор уҡый. Радио фонды өсөн  2012 йылда яҙылған. 

22.10.2017

   Башҡортостандың халыҡ шағиры  Мостай  Кәримдең  әҙәбиәтебеҙгә, рухи донъябыҙға  һалған хеҙмәте баһалап бөткөһөҙ . Тәрән фәлсәфәгә һәм нескә лирикаға бай  шиғырҙар  ҙа, ил-донъя, халыҡ яҙмышы, әҙәм балаһының ер йөҙөндәге  тәғәйенләнеше хаҡында уйланыуҙарҙан туҡылған  проза һәм драма әҫәрҙәре лә, ғүмер миҙгелдәрен байҡаған иҫтәлектәре лә бай ижади мираҫын  тәшкил итә.  Әҫәрҙәре башҡорт әҙәбиәте  генә түгел,  милли театр сәнғәте  үҫешенә лә  ҙур ҡеүәт бирҙе.  Мостай  Кәрим - башҡорт әҙәбиәтенең  донъя  мәҙәни  мөхитенә  юл ярыусыһы, танытыусыһы. Шағирҙың   поэтик мираҫынан  шәлкем  радио фондына автор  уҡыуында  яҙылған. 

15.10.2017

   Күренекле башҡорт әҙибе Аҫылғужа Баһуманов шағир, публицист, прозаик, тәржемәсе  булараҡ һәлмәк ижади мираҫ ҡалдырҙы. Поэмалары, либреттоһы, шиғырҙары  тупланған йыйынтыҡтары донъя күрә, “Салауаттың йәше” романының беренсе китабы баҫыла. Аҫылғужа Ишемғужа улы Баһуманов  “Совет Башҡортостаны” газетаһында – бүлек мөдире,   “Китап” нәшриәтендә - директор, мөхәррир булып эшләй, Сибай яҙыусылар ойошмаһына етәкселек итә, республиканың йәмәғәт эшендә лә әүҙем ҡатнаша. Аҫылғужаның  шиғри шәлкеме радио фондына 1989 йылда автор уҡыуында яҙылған. 

17.09.2017

  Риф Мифтахов  башҡорт  әҙәбиәтендә  шағир, тәржемәсе, сатира һәм юмор оҫтаһы, йырҙар авторы, Рәшит Назаровтың  ижадын  өйрәнеүсе һәм уҡыусыға еткереүсе булараҡ билдәле. “Өскөл хаттар” тип исемләнгән тәүге йыйынтығы  1972 йылда донъя күрә һәм уҡыусылар, тәнҡитселәр тарафынан  йылы ҡабул ителә, яҡшы баһаланып, әҙәбиәткә үҙ йөҙө булған шағир килеүен раҫлай. Төрлө йылдарҙа  Өфөлә һәм Мәскәүҙә баҫылған шиғри йыйынтыҡтары, проза китабы  аша Риф Мифтахов халыҡҡа әҙип һүҙен еткерә. Шиғри шәлкеме автор уҡыуында яңғырай.

Страницы

тура ЭФИР

Online 128 КБитс/с

105.5 FM

Аудио ағым

әле эфирҙа


Һауа торошо (Өфө)

төндә -1..-3°C
иртән -1..1°C
көндөҙ 4..6°C
кис 3..5°C
www.gismeteo.ru
Текста орфографик хата:
Хата тураһында хәбәр итеү өсөн “Хата тураһында хәбәр итегеҙ” төймәһенә баҫығыҙ. Шулай уҡ һеҙ хәбәргә комметарий өҫтәй алаһығыҙ.